GEO ENG
 

 







 

2014-04-11
კომაროვის სკოლაში სამეცნიერო კვლევის პრეზენტაცია გიამართა

ვ. კომაროვის თბილისის 199-ე საჯარო სკოლაში სამინისტროს მიერ დაფინანსებული პროგრამის “კვლევები მოსწავლეთა მონაწილეობით” ფარგლებში, პროექტის „მდინარე მტკვრის დაბინძურების რიცხვითი მოდელირება“ პრეზენტაცია გაიმართა. პრეზენტაციას საქართველოს განათლებისა და მეცნიერების მინისტრი თამარ სანიკიძე და შოთა რუსთაველის ეროვნული სამეცნიერო ფონდის გენერალური დირექტორი სულხან სისაური გაეცნენ.

პროექტი მეტად აქტუალურ საკითხს - ეკოლოგიას ეხება და მისი მიზანია მოსწავლეებთან ერთად, მათემატიკისა და ფიზიკის მეთოდების გამოყენებით, ეკოლოგიური სახის ამოცანები შესრულდეს.

პროექტის ფარგლებში, მოსწავლეებმა მდინარე მტკვრის შესაძლო დაბინძურების მიმდინარეობა სხვადასხვა სიტუაციებში შეისწავლეს საქართველოს სახელმწიფო საზღვრიდან მინგეჩაურის წყალსაცავამდე და მუშაობისას, ეკოლოგიური პროცესების მოდელირების რიცხვითი მეთოდები გამოიყენეს.

სამეცნიერო კვლევის შედეგები შესაძლებელს ხდის შეფასებული იქნეს ავარიული სიტუაციებისას როგორი იქნება მდინარის დაბინძურების ხარისხი სხვადასხვა დროს, სხვადასხვა ადგილზე.

ავარიული სიტუაციების შემთხვევაში, მიღებული ინფორმაცია ეკოლოგიურ სამსახურებს საშუალებას მისცემს სხვადასხვა ეკოლოგიური უსაფრთხოების საკითხები გადაწყვიტონ. სამეცნიერო პროექტზე მუშაობა სამი თვის განმავლობაში მიმდინარეობდა და ამ პროცესს ფიზიკა–მათემატიკის მეცნიერებათა დოქტორი ალექსანდრე სურმავა ხელმძღვანელობდა.

სამეცნიერო კვლევებში მოსწავლეების ჩართულობა საუკეთესო საშუალებაა მოსწავლეების მეცნიერებით დაინტერესებისთვის, კვლევითი უნარების გამომუშავებისა და ზოგადად, განათლების ხარისხის ასამაღლებლად. სამინისტროს შოთა რუსთაველის ეროვნული სამეცნიერო ფონდის პროგრამა “კვლევები მოსწავლეთა მონაწილეობით” გასულ წელს იქნა ინიცირებული. 2013 წელს კომაროვის სკოლის მოსწავლეების მიერ წარდგენილი 4 სამეცნიერო კვლევა დაფინანსდა.

share